Kardinal Sandri: Papa Fransisk xidmət və uzaqgörənlik mirası qoydu

Françeska Merlo tərəfindən

Kardinal Leonardo Sandri beşinci “Novendiales” Messasındakı vəzinə “Məsih Dirildi” sözləri ilə başladı. O bildirdi ki, Pasxa dövründə Kilsə iki vacib mərhələnin arasındadır: Papa Fransiskin papalığının sonu və yeni bir papalığın başlanğıcı. Bir neçə gündən sonra, deyə o vurğuladı, Kardinal Protodiakon yenidən Müqəddəs Peter bazilikasının eyvanına çıxaraq yeni Papanın adını elan edəcək. Kardinal Sandrinin sözlərinə görə, bu rol öz mənasını Məsihin Dirilməsi ilə bağlı Pasxa təcrübəsində tapır.

Birlikdə xatırlamaq, birlikdə dua etmək

Kardinal Sandri izah etdi ki, “Novendiales” Messaları yalnız matəm deyil, eyni zamanda Kilsənin bir araya gəldiyi, birlikdə dua etdiyi, birlikdə xatırladığı və Dirilməyə olan imanını yenidən təsdiqlədiyi bir andır. Kardinallar yalnız Papa ilə əməkdaşlıq edən şəxslər kimi deyil, həm də dünyanın dörd bir yanından – Tonqadan Monqolustana, Tehrandan Yerusəlimə, Mərakeş və Əlcəzair kimi xristianların azsaylı, lakin imanlı olduqları yerlərdən gələn dualarla bir araya gəlmiş insanlardır.

“Biz hər gün hökmranlıq etməyin xidmət etmək olduğunu xatırlamağa və bu həqiqtəi şüurlu şəkildə yaşamağa çağırılmışıq” deyə kardinal Papa Fransiskdən sitat gətirdi və vurğuladı ki, Papa öz pontifikatını da məhz bu ruhda yaşamışdır: əməlləri ilə, səfərləri ilə və daim kənarda qalanlara göstərdiyi qayğı ilə.

O qeyd etdi ki, vaxtilə Böyük Qriqori tərəfindən istifadə olunan papaların “Allahın qullarının qulu” titulu, Papa Fransisk üçün çox əhəmiyyətli idi. Papa Kilsəyə daim xatırladırdı ki, onun əsas missiyası xidmət etməkdir.

Müqəddəs Yazılardan bu günə

Həvarilərin İşləri kitabından günün oxunuşu üzərində düşünən kardinal Sandri qeyd etdi ki, Peterin Pentekost zamanı etdiyi nitq təsadüfi seçilməyib. Bu nitq yalnız Kilsənin başlanğıcına deyil, həm də bir tamamlanmaya işarə edir. Eynilə Pentekost Həvarilər üçün yeni bir mərhələ olduğu kimi, Kilsə də bu gün yeni bir dövrə hazırlaşır.

Sonra Kardinal tez-tez Papa Fransisk tərəfindən sitat gətirilən Yoel peyğəmbərin sözlərini xatırlatdı: “Ondan sonra isə bütün bəşər üzərinə Ruhumu tökəcəyəm. Oğullarınız və qızlarınız peyğəmbərlik edəcək, ağsaqqallarınız röyalar, cavanlarınızsa görüntülər görəcək.”

Kardinal Sandri qeyd edib ki, Papa Fransisk bu ayəni tez-tez nəsillərin birləşməsinin vacibliyi ilə əlaqələndirirdi. “Yaşlılarla gənclər arasında bu görüş olmadan gələcək yoxdur,” o izah edib.

Kilsə üçün bir xəyal

Vəzinin sonunda kardinal Sandri vurğuladı ki, Papa Fransisk artıq Kilsənin gələcəyi üçün bir baxış formalaşdırıb. 2025-ci il Yubiley ili üçün yazdığı Pontifikal Bullasında o, daha bir böyük ildönümünə – İsa Məsihin Əzabları, Ölümü və Dirilməsinin 2000 illiyinə, yəni 2033-cü ilə işarə edib.

“Bu Müqəddəs İl xristianların yolunu istiqamətləndirəcək… beləliklə, ruhən hamımız Müqəddəs Torpağa zəvvar olaq və bir daha elan edək: ‘Rəbb həqiqətən dirildi və Şimona göründü!’” – deyə kardinal yekunlaşdırdı.