Малайзійскі Касцёл чакае вялікае папаўненне ў Пасхальную ноч
Аляксандр Амяльчэня - Vatican News
Водбліск велікоднай свечкі асветліць твары больш чым двух тысяч малайзійцаў, якія ўступяць у каталіцкую супольнасць падчас надыходзячай Пасхальнай вігіліі. Як паведамляе агенцтва “Fides”, спасылаючыся на мясцовыя касцельныя крыніцы, гэтая падзея стане сапраўдным святам веры ў краіне, дзе хрысціяне складаюць меншасць насельніцтва.
Блізу паловы будучых неафітаў – 1 047 чалавек – прадстаўляюць Малайскі паўвостраў, астатнія – востраў Барнэа. Ужо на працягу Вялікага посту яны зрабілі рашучы крок наперад, удзельнічаючы ў "абрадзе выбрання" – старажытным літургічным дзеянні, якое з першых стагоддзяў хрысціянства пазначае афіцыйнае прыняцце катэхуменаў у шэрагі Касцёла.
У дыяцэзіі Куала-Лумпуры 549 катэхуменаў сабраліся ў сценах касцёла Святой Сям'і ў Каянгу. Там арцыбіскуп Джуліян Леў Бенг Кім, узначальваючы ўрачыстую Імшу, нагадаў ім пра глыбокі сэнс іх духоўнага падарожжа ў кантэксце Юбілейнага года, прысвечанага тэме "Пілігрымы надзеі".
У гістарычнай дыяцэзіі Мелака-Джахор 281 катэхумен з 17 розных парафій сабраліся пад старадаўнімі скляпеннямі катэдры Найсвяцейшага Сэрца Езуса. Біскуп Энтані Бернард Паўл падкрэсліў важнасць іх духоўнага шляху і заахвоціў заўсёды заставацца адкрытымі да ціхага шэпту Божага голасу.
На поўначы краіны, у дыяцэзіі Пенанг, кардынал Себасцьян Фрэнсіс сустрэўся з 217 катэхуменамі. Сярод іх – 156 дарослых з паўночных і астраўных дэканатаў і 61 малады чалавек са штата Перак, якія знайшлі натхненне ў сведчанні такіх сучасных узораў веры, як благаслаўлёны Карла Акуціс, чыя кананізацыя адбудзецца 27 красавіка 2025 года.
На пышна-зялёным востраве Барнэа, сярод вечназялёных трапічных лясоў, 1 125 катэхуменаў з архідыяцэзіі Кота-Кінабалу таксама завяршаюць сваю падрыхтоўку пад духоўным кіраўніцтвам арцыбіскупа Джона Вонга Су Каў. Яны з нецярпеннем чакаюць моманту, калі хросная вада змые іх ранейшае жыццё і разгорне новую старонку іх духоўнага шляху.
Такі значны прырост вернікаў сведчыць пра сталае пашырэнне каталіцкай веры ў Малайзіі, дзе хрысціяне складаюць меншасць, але дэманструюць дынамічнае развіццё.
