Аўдыенцыі Папы Францішка: 35 мільёнаў удзельнікаў за 12 гадоў
Аляксандр Амяльчэня - Vatican News
У 2024 годзе было праведзена 41 агульная аўдыенцыя, у якіх удзельнічала больш за паўмільёна вернікаў. За 2025 год ужо 60 тысяч чалавек прынялі ўдзел у васьмі аўдыенцыях.
Аўдыенцыі з удзелам Пантыфіка з’яўляюцца адносна новым звычаем у Ватыкане. Яны бяруць пачатак з часоў Пія XII, які ў красавіку 1939 года правёў першую серадоваю катэхезу для маладых жанатых пар. Падчас Другой сусветнай вайны і акупацыі Рыма гэтыя сустрэчы былі прыпынены, а пасля вайны іх аднавіў Ян ХХІІІ. Спачатку аўдыенцыі праводзіліся ў Кастэль Гандольфа, а з цягам часу сталі рэгулярным элементам касцельнага жыцця ў Ватыкане.
Агульныя аўдыенцыі – звычай, які стаў неад’емнай часткай сучаснага Касцёла
Сёння агульныя аўдыенцыі праходзяць на італьянскай мове і дапаўняюцца кароткімі анонсамі катэхез на англійскай, французскай, іспанскай, нямецкай, партугальскай, арабскай, кітайскай і польскай мовах. Групы пілігрымаў з розных краін таксама атрымліваюць асабістыя прывітанні ад Папы.
Рост колькасці ўдзельнікаў аўдыенцый запатрабаваў новых архітэктурных рашэнняў
З павелічэннем колькасці ўдзельнікаў у часы Паўла VI з’явілася патрэба ў вялікай закрытай прасторы для аўдыенцый. У 1971 годзе ў Ватыкане была адкрыта спецыяльная Зала Паўла VI, разлічаная на 12 тысяч чалавек.
Першым пераломным момантам стала аўдыенцыя 13 ліпеня 1963 года з удзелам Паўла VI, калі Папа ўпершыню прамаўляў на французскай, іспанскай, нямецкай і англійскай мовах, што зрабіла гэты фармат яшчэ больш даступным для міжнароднай аўдыторыі.
Адкрытасць свету – аўдыенцыі Папы сталі глабальнай падзеяй
Усяго чатыры аўдыенцыі паспеў правесці Ян Павел I, які памёр 28 верасня 1978 года пасля 33 дзён пантыфікату. Ён прысвячаў свае сустрэчы хрысціянскім цнотам веры, надзеі і любові.
Сёння агульныя аўдыенцыі сталі важнай часткай жыцця Каталіцкага Касцёла і даюць мільёнам вернікаў з усяго свету магчымасць асабістага кантакту з Пантыфікам. Публікацыя дадзеных аб колькасці ўдзельнікаў выразна падкрэслівае значэнне аўдыенцый для ўсяго Касцёла.
