Ватыкан: абвешчана дата пахавання Папы Францішка
Пахаванне Папы Францішка адбудзецца 26 красавіка 2025 года. Літургія распачнецца а 10.00 па цэнтральнаеўрапейскім часе на плошчы перад Базілікай Святога Пятра.
Аляксандр Панчанка - Vatican News
Рашэнне аб даце пахавання было прынята кардыналамі, якія прысутнічалі на першай генеральнай кангрэгацыі, скліканай пасля смерці Святога Айца. Яна адбылася раніцай 22 красавіка 2025 года ў ватыканскай Зале Паўла VI.
Служба папскіх літургічных цэлебрацый паведаміла, што пахавальную Імшу ўзначаліць кардынал Джавані Батыста Рэ, дэкан Калегіі кардыналаў. Яе змогуць канцэлебраваць патрыярхі і кардыналы, арцыбіскупы, біскупы і святары.
Пасля эўхарыстычнай цэлебрацыі адбудуцца абрад і малітва апошняга развітання (Ultima commendatio і Valedictio). Затым труну з целам Пантыфіка перанясуць у Базіліку Святога Пятра, а адтуль – у Базіліку Санта-Марыя-Маджорэ для пахавання.
22 красавіка 2025, 10:39
