Пантыфік сустрэўся з вязнямі ў рымскай турме
Аляксандр Амяльчэня - Vatican News
17 красавіка 2025 года Папа прыбыў з візітам у акруговую турму "Regina Coeli" у Рыме. Як паведамляе Зала Друку Святога Пасада праз свой тэлеграм-канал, пры ўваходзе ў пенітэнцыярную ўстанову Пантыфіка прывіталі дырэктар Клаўдыя Клеменці і прадстаўнікі персаналу.
Паводле афіцыйнага паведамлення, Святы Айцец накіраваўся ў цэнтральную ратонду, дзе адбылася яго сустрэча з прыблізна 70 зняволенымі. Гэта цэнтральная частка турэмнага комплексу, якая звычайна выкарыстоўваецца для важных падзей і мерапрыемстваў.
"Regina Coeli”, размешчаная ў раёне Трастэвэрэ, мае доўгую гісторыю і з'яўляецца адным з найбольш вядомых пенітэнцыярных аб'ектаў італьянскай сталіцы.
Візіт Францішка ў турму працягвае традыцыю яго пастырскай увагі да зняволеных. На працягу свайго пантыфікату Святы Айцец неаднаразова наведваў розныя пенітэнцыярныя ўстановы і падкрэсліваў важнасць гуманнага стаўлення да асуджаных.
Дэталі сустрэчы Пантыфіка з вязнямі і змест яго звароту да іх будуць вядомыя пазней.
