Жэсты сяброўства: абмен віншаваннямі паміж Папам і рабінам
Аляксандр Амяльчэня - Vatican News
Як паведамляе яўрэйская супольнасць Рыма на сваёй афіцыйнай старонцы ў сацыяльнай сетцы “Facebook”, з нагоды Пасхі Францішак і галоўны рабін Рыма Рыкарда Дзі Сеньі абмяняліся віншавальнымі пасланнямі.
Звяртаючыся да яўрэйскай супольнасці, Папа адзначыў глыбокі сэнс Песаха, які сёлета святкуецца ў 5785 годзе паводле яўрэйскага летазлічэння.
Малітва адно за аднаго
"Гэтае свята нагадвае, што Усемагутны вызваліў свой любімы народ з рабства і прывёў яго ў Зямлю Абяцаную", - напісаў Святы Айцец у сваім пасланні да рабіна Дзі Сеньі і яўрэйскай супольнасці Рыма.
Пантыфік у сваім пасланні пажадаў: "Вечны і міласэрны Бог няхай будзе з вамі і сёння, суправаджае вашу супольнасць багаццем сваіх благаслаўленняў і, у сваёй бясконцай дабрыні, заўсёды абараняе вас".
У заключэнні Францішак папрасіў яўрэйскіх вернікаў маліцца за яго, запэўніваючы ў сваёй малітве за іх: "Прашу вас працягваць маліцца за мяне, у той час як я запэўніваю ў сваёй малітве за вас: няхай Усявышні дапаможа нам усё больш і больш узрастаць у сяброўстве", - дадаў Папа, завяршаючы сваё пасланне традыцыйным яўрэйскім віншаваннем "Chag sameach" (Шчаслівага свята).
Умацаванне сяброўства ў цяжкія часы
У сваю чаргу, Рыкарда Дзі Сеньі адказаў цёплым пасланнем, у якім адзначыў супадзенне пасхальных свят абедзвюх рэлігійных традыцый. "Жадаю выказаць гарачыя віншаванні з асаблівымі думкамі пра ваша здароўе, якое, спадзяюся, будзе паляпшацца", - напісаў галоўны рабін Рыма.
Ён таксама падкрэсліў важнасць умацавання сувязяў паміж католікамі і юдэямі ў цяперашні няпросты час: "Няхай Пан благаславіць нашы супольнасці і ўмацуе наша сяброўства таксама ў цяжкі перыяд, які мы перажываем".
Традыцыя абмену віншаваннямі паміж Папам і галоўным рабінам Рыма з'яўляецца важным сведчаннем міжрэлігійнага дыялогу і ўзаемапавагі, якія развіваюцца паміж каталіцкімі і яўрэйскімі вернікамі.
