Папа

Папа да тасканцаў: малітва – зброя супраць выклікаў сучаснасці

У пасланні да пілігрымаў з дыяцэзій Грасэта і Піцільяна-Савана-Арбетэла Папа заахвочвае вернікаў трываць у малітве і быць сведкамі надзеі, нягледзячы на цяжкасці сучаснага свету.

Аляксандр Амяльчэня - Vatican News

Святы Айцец звярнуўся з пасланнем да вернікаў з дзвюх італьянскіх дыяцэзій, якія прыбылі ў Рым у рамках Юбілейнага года. "Праходжанне праз Святую Браму няхай адновіць усіх у веры, каб вы маглі крочыць разам, пастыр і статак", - піша Папа Францішак у сваім пасланні, адрасаваным пілігрымам, якія прыбылі ў Рым 9 красавіка 2025 года.

Асаблівае месца ў пасланні Пантыфіка займае прывітанне новага біскупа гэтых дыяцэзій Бернардзіна Джардана, які суправаджае сваіх вернікаў падчас гэтага важнага духоўнага падарожжа ў Юбілейны год.

"Звяртаюся асабліва да тых з вас, хто хварэе і да пажылых: перажывайце гэты час выпрабаванняў, сузіраючы Пана Езуса на крыжы, крыніцу суцяшэння і збаўлення", - адзначае Святы Айцец, выказваючы сваю блізкасць да найбольш уразлівых прадстаўнікоў супольнасці.

"Перад абліччам цяжкасцей, якія мы бачым у свеце і адчуваем у сэрцы, заахвочваю вас трываць у малітве, штодзённа сведчачы тую надзею, якая робіць нас соллю зямлі", - піша Пантыфік, нагадваючы вернікам пра іх місію ў сучасным грамадстве.

Заканчваючы сваё пасланне, Францішак даручае пілігрымаў заступніцтву Дзевы Марыі і іх святых заступнікаў, удзяляючы ім сваё благаслаўленне і просячы малітвы за яго самога.

Варта адзначыць, што дыяцэзіі Гросета і Піцільяна-Савана-Арбетэла знаходзяцца ў рэгіёне Таскана і маюць багатую духоўную і культурную гісторыю.