Біскупы Іспаніі: каталіцызм не частка нацыянальнай ідэнтычнасці?
Аляксандр Амяльчэня - Vatican News
Падчас 127-га пленарнага пасяджэння епіскапату арцыбіскуп Вальядаліда Луіс Аргуэльё прадставіў трывожную карціну рэлігійнай сітуацыі ў краіне. "Скончыўся час, калі можна было сказаць: я католік, бо нарадзіўся ў Іспаніі," - падкрэсліў ён, адзначаючы, што Касцёл ужо не можа разлічваць на натуральную перадачу веры ў сучасным грамадстве.
У многіх хрысцільніцах ужо няма вады
"У 70 дыяцэзіях мы маем каля 23 тысяч хрысцільніц, але ў многіх з іх ужо няма вады," - сказаў арцыбіскуп Аргуэльё, бачачы ў гэтым сімвал недахопу хрысціянскіх супольнасцей, здольных "дапамагаць Духу Святому ў нараджэнні новых хрысціян".
Старшыня епіскапату адзначыў значны кантраст паміж сельскімі і гарадскімі парафіямі: "У многіх сельскіх парафіях ужо няма магчымасці адпраўляць нядзельную Эўхарыстыю, у той час як у вялікіх гарадах назіраецца вялікая розніца ў гадзінах і відах набажэнстваў, у залежнасці ад раёна."
Пагроза размыцця евангельскага паслання
"Залежнасць ад дзяржаўных субсідый можа прывесці да таго, што нашы дабрачынныя ўстановы страцяць сваю хрысціянскую сутнасць. Існуе небяспека, што яны ператворацца ў звычайныя бюракратычныя структуры, падобныя да іншых няўрадавых арганізацый, губляючы пры гэтым здольнасць дэманстраваць свежасць і навізну хрысціянскай любові," - падкрэсліў іерарх.
Краіна каталіцкай традыцыі стала лідарам секулярызацыі
Паводле даследаванняў “Pew Research Center”, 35 працэнтаў дарослых жыхароў Іспаніі, выхаваных у хрысціянскай веры, цяпер не належаць ні да якой рэлігіі – гэта самы высокі паказчык у Еўропе, апярэджваючы Швецыю і Германію (па 29 працэнтаў), Нідэрланды (28 працэнтаў) і Вялікабрытанію (26 працэнтаў).
Такім чынам, Іспанія, якая стагоддзямі была адной з самых каталіцкіх краін Еўропы, цяпер сутыкаецца з глыбокімі зменамі ў рэлігійным ландшафце, што патрабуе новых падыходаў да евангелізацыі.
