Арцыбіскуп Эруар: Еўропа павінна ўсвядоміць сур'ёзнасць сітуацыі
Аляксандр Амяльчэня - Vatican News
Падчас вясновага пленарнага пасяджэння Камісіі Біскупскіх Канферэнцый Еўрапейскай Супольнасці (COMECE), якая адбылася ў Нэмі, непадалёк ад Рыма, іерархі сустрэліся з высокімі прадстаўнікамі Святога Пасада, уключаючы кардынала П'етра Параліна і арцыбіскупа Пола Галахера. Арцыбіскуп Эруар, віцэ-старшыня COMECE, падзяліўся вынікамі гэтых сустрэч на хвалях каталіцкага радыё “KTO”.
Прывід імперыі зноў блукае па Еўропе
"Існуе вялікая занепакоенасць рызыкай усеагульнай вайны з Расіяй", - заявіў арцыбіскуп Эруар, адлюстроўваючы настроі, якія панавалі падчас сесіі. Ён папярэдзіў, што краіны, геаграфічна аддаленыя ад украінскага фронту, памылкова лічаць сябе ў бяспецы. "За вайной ва Украіне стаіць жаданне аднавіць расійскую імперыю, якая можа пашырацца і атакаваць іншыя краіны, нават калі не абавязкова ваенным шляхам", - падкрэсліў ён.
Мір без справядлівасці – гэта толькі перапынак паміж войнамі
Спасылаючыся на вучэнне святога Яна Паўла II, іерарх нагадаў: "Не можа быць міру без справядлівасці, а справядлівасці без павагі да правоў чалавека". Ён заклікаў да аб'ектыўнай ацэнкі сітуацыі: важна захоўваць яснасць у разуменні прычын і наступстваў бягучага канфлікту, каб можна было працаваць над яго справядлівым вырашэннем.
Абарона – не агрэсія, а неабходнасць выжывання
Што да ўзбраення еўрапейскіх краін, арцыбіскуп Эруар адзначыў, што Касцёл не падтрымлівае гандаль зброяй, але прызнае права на абарону ад агрэсара. "Пэўная колькасць краін павінна зрабіць больш, каб абараніць сябе", - дадаў ён, нагадваючы, што раней многія еўрапейскія краіны спадзяваліся на амерыканскую армію.
Дыялог немагчымы там, дзе гавораць толькі гарматы
Адной з галоўных праблем сёння з'яўляецца недахоп эфектыўных каналаў камунікацыі паміж усімі зацікаўленымі бакамі, падсумаваў арцыбіскуп. Ён падкрэсліў важнасць стрыманасці ў рыторыцы, на што ўказаў Папа Францішак, які паслядоўна працуе над стварэннем умоў для канструктыўнага дыялогу і пошуку шляхоў да міру.
