Юбілейны год у Рыме: сакральнае ў сучасным мастацтве
Аляксандр Амяльчэня - Vatican News
З 17 красавіка па 14 верасня 2025 года “Музей Карла Білоці” ў Аранжарэі Вілы Баргезе запрашае наведаць выставу "Tra mito e sacro", якая прапануе погляд на вымярэнне сакральнага ў сучасным мастацтве. Экспазіцыя аб'яднае творы з капіталійскіх калекцый, уключаючы экспанаты з “Галерэі сучаснага мастацтва”, “Музея Рыма” ў Палаца Браскі і іншых збораў.
Мастацтва, якое запрашае да роздуму
"Сакральнае ў сучасным мастацтве часта выходзіць за межы традыцыйных рэлігійных вобразаў, прапануючы новыя шляхі духоўнага пошуку", - адзначаюць арганізатары выставы.
Сярод ключавых экспанатаў – інсталяцыя Алесандры Тэзі "Катэдра", якая вяртаецца да публікі пасля дзесяці гадоў і дазваляе наведвальнікам пагрузіцца ў атмасферу сапраўднага месца культу. Таксама будзе прадстаўлена "Венера" Марыа Чэролі на залачоных драўляных элементах і праца Алесандра П'янджаморэ "Воск Рыма", створаная з воску ватыўных свечак з касцёлаў італьянскай сталіцы.
Боль і трансцэндэнтнасць
Абстрактныя скульптуры Леанчыла метафарычна перадаюць успрыманне болю, а ўзнёслы твар "Трансцэндэнтнага" Карла Марыя Марыяні запрашае да духоўных разважанняў. Асаблівае ўражанне зробіць скульптура Марка Куіна – шкілет у малітве, іранічны сімвал мінучасці чалавечага жыцця.
Спецыяльны раздзел выставы прысвечаны Сідывалю Філа – францішканскаму манаху і мастаку, які працуе з матэрыяламі, што выйшлі з ужытку. Яго мастацкі падыход дэманструе, як рэчы, якія здаюцца непатрэбнымі, могуць атрымаць новае жыццё і сэнс у мастацкім кантэксце, што можна разглядаць як метафару духоўнага абнаўлення.
Выстава "Паміж міфам і сакральным" стане важнай падзеяй у культурнай праграме Юбілейнага 2025 года, прапануючы наведвальнікам унікальную магчымасць паразважаць над сувяззю паміж сучасным мастацтвам і сакральнымі тэмамі.
