Кардынал Гамбэці: гуманнасць Францішка кранала нават камяні
Аляксандр Амяльчэня - Vatican News
Чацвёртая Імша ў перыяд “навендыялаў” – дзевяці дзён жалобы – у малітоўным успаміне Папы Францішка, якая адбылася ўвечары 29 красавіка 2025 года ў Базіліцы Святога Пятра, сабрала разам прадстаўнікоў усіх папскіх базілік і стварыла атмасферу ўдзячнасці і разважанняў аб місіі Касцёла ў сучасным свеце.
Кардынал Маўра Гамбэці, архіпрэсбітэр базілікі, звярнуўся да вернікаў з глыбокай гаміліяй, якая накіроўвала думкі да сутнасці Евангелля і да асобы спачылага Святога Айца.
“Калі ты крануў чалавека – ты крануў Бога, калі шануеш чалавека – шануеш Бога, калі пагарджаеш чалавекам – пагарджаеш Богам”, - гэтыя словы, цытаваныя іерархам са спадчыны Эліа Чытэрыа, сталі асноўнай думкай гаміліі. Ён засяродзіў увагу на прыпавесці з евангельскага чытання, дзе гаворыцца пра дзве групы: авечкі і казлы, якія ўвасабляюць вернасць і мяцежнасць, салідарнасць і эгаізм.
Не знешняе вызнанне веры ці веданне тэалогіі вызначае месца ў Божым Валадарстве
Як падкрэсліў кардынал, прыналежнасць да Божага Валадарства вызначаецца не знешняй набожнасцю: “Гэта не проста вызнанне веры, не толькі веданне тэалогіі і ўдзел у сакрамэнтах, а менавіта шчырая, глыбокая і сапраўдная прысутнасць у лёсе найменшых братоў – гэта адкрывае шлях да радасці ў Богу”. Так, унутраная сутнасць хрысціянства раскрываецца праз міласэрнасць і шчырую блізкасць да бліжняга.
У гаміліі Гамбэці прывёў словы Эдыт Брук, змешчаныя ў "L'Osservatore Romano" 23 красавіка 2025 года, як жывы і паэтычны вобраз вялікай хрысціянскай чалавечнасці Папы Францішка. Па словах аўтаркі, "мы страцілі Чалавека (...) што любіў, умеў крануцца і крануць, плакаў, маліўся за мір, умеў смяяцца, цалаваць і абдымаць, хваляваўся і натхняў, распаўсюджваў цяпло, (...) а яго чалавечнасць была настолькі моцнай і сапраўднай, што кранала нават камяні".
Касцёл – дом для ўсіх
Архіпрэсбітэр Базілікі Святога Пятра нагадаў словы Папы Францішка, прамоўленыя падчас сустрэчы з езуітамі ў Лісабоне ў 2023 годзе: “Усе, усе, усе пакліканы жыць у Касцёле: не забывайцеся пра гэта ніколі!”. Гэты заклік да адкрытасці падкрэслівае сапраўднае пакліканне Касцёла быць домам для кожнага чалавека, незалежна ад яго жыццёвага шляху.
У дзень, калі Касцёл адзначаў успамін святой Кацярыны Сіенскай, італьянскі іерарх заклікаў да евангелізацыі праз "адкрытасць да чалавека без аніякіх меж, шчырая, бескарыслівая ўвага да бліжняга – не дзеля празелітызму, а дзеля супольнага перажывання жыццёвага досведу і гатоўнасці прыйсці на дапамогу кожнаму мужчыне і кожнай жанчыне, каб кожны змог паверыць у паўнату жыцця і Божую ласку".
Свае разважанні кардынал Гамбэці завяршыў малітоўным зваротам да Найсвяцейшай Панны Марыі – пакорнай Служаніцы Пана, якая падарыла свету Збаўцу, просячы, каб Яна паказвала нам шлях сапраўднага вучнёўства і евангельскага абвяшчэння.
