Апублікаваны дэталі цырымоніі закрыцця труны Папы Францішка
Аляксандр Амяльчэня - Vatican News
Літургічны тэкст, падрыхтаваны Папскім бюро літургічных цэлебрацый, утрымлівае дэталёвы парадак цырымоніі, якая папярэднічае пахавальнай Імшы.
Надзея на вечнае жыццё
Цырымонія пачнецца са слоў цэлебранта: “Дарагія браты і сёстры, мы сабраліся тут, каб выканаць некаторыя набожныя абрады перад пахавальнай Імшой нашага Папы Францішка”. Падчас цырымоніі будзе зачытаны афіцыйны дакумент, які ўзгадвае жыццё і найважнейшыя справы Пантыфіка.
Адной з ключавых малітваў цырымоніі з'яўляецца зварот да Бога: "Усемагутны, вечны Божа, Пане жыцця і смерці, мы спадзяёмся і верым, што жыццё нашага Папы Францішка цяпер схавана ў табе. Няхай яго твар, для якога згасла святло гэтага свету, будзе асветлены назаўжды сапраўдным святлом, якое мае ў табе невычэрпную крыніцу".
Пераход ад зямнога да нябеснага
Падчас цырымоніі твар Пантыфіка будзе пакрыты белым шаўковым вэлюмам, а цела акроплена асвечанай вадой. У малітве цэлебрант скажа: "Яго твар, які сузіраў твае шляхі, каб паказаць іх Касцёлу, няхай убачыць цяпер твой айцоўскі твар. Яго твар, які знікае з нашага поля зроку, няхай сузірае тваю прыгажосць і даручае сваю паству табе, вечнаму Пастыру".
Літургія ўключае спеў псальмаў, якія выражаюць надзею на сустрэчу з Богам, сярод якіх Псальмы 41 і 26.
Пошук Божага аблічча
У труну Папы будуць пакладзены манеты і медалі, выбітыя падчас яго пантыфікату, а таксама туба з афіцыйным дакументам, запячатаная пячаткай Бюро літургічных цэлебрацый.
Пасля гэтага цынкавая труна будзе запаяна і на ёй будуць пастаўлены пячаткі кардынала-камерленга, Прэфектуры Папскага дома, Бюро літургічных цэлебрацый і Ватыканскага капітула. На вечку труны будзе размешчаны крыж і герб памерлага Пантыфіка, а таксама шыльда з яго імем, датамі жыцця і працягласцю яго Пятровага служэння.
Велікодная радасць
Цырымонія завершыцца марыйнай антыфонай "Regina Caeli", якая спяваецца ў велікодны перыяд: "Уладарка Неба, радуйся!”.
Пахавальная Імша адбудзецца на наступны дзень пасля цырымоніі закрыцця труны. Падчас яе Касцёл афіцыйна развітаецца з Папам Францішкам, які кіраваў Каталіцкім Касцёлам з 2013 года.
