Ապրիլեան Նահատակաց նուիրուած յուշ երեկոյթ Պաղտատի Հ. Կ. Թեմի Մայր Տաճարին մէջ

Վատիկան Նիւոզ - Հայկական բաժանմունք

24 Ապրիլ 2025-ին, Հայոց Ցեղասպանութեան 110-րդ տարելիցին առթիւ, Մայր Հայաստանի և Սփիւռքի բոլոր գաղութներէն ներս՝ Ապրիլեան Նահատակաց յիշատակը յաւերժացնող հրապարակական հանդիսութիւններ տեղի ունեցան: Յիշատակութեան արժանի է նորոգ հանգուցեալ Ֆրանչիսկոս Պապի վկայութիւնը՝ թէ «Քսաներորդ դարու առաջի՛ն ցեղասպանութիւն»ը կատարուած է այն ազգին, որ եղաւ առաջի՛նը, որ ողջագուրեց Քրիստոսի խաչը ու քալեց գողգոթայի ճանապարհին վրայ, հետեւելով Անոր որ ճշմարտութիւն է, ճանապարհ եւ կեանք` եւ նաեւ յոյսի աղբիւր»: Ան ազդարարեց, ըսելով՝ թէ «չարը թաքցնելը կամ ժխտելը նման է թոյլ տալու` որ վէրք մը շարունակէ արիւնիլ, առանց զայն դարմանելու»: Այսպէս, Հինգշաբթի 24 Ապրիլ 2025-ին, երեկոյեան ժամը 6:00-ին, Պաղտատի Հ. Կ. Թեմի «Տիրամայր Նարեկի» Մայր Տաճարին մէջ, գեղարուեստական երեկոյթ մը տեղի ունեցաւ, որուն նախագահեց Պաղտատի Հ. Կ. Թեմի Առաջնորդ՝ Գերպծ. Հ. Ներսէս Արք. Զապարեանը: Հանդիսութեան իրենց մասնակցութիւնը բերին Իրաքի մէջ՝ ՀՀ լիազօր Դեսպան՝ Ռուբէն Սողոյեանը, Դեսպանատան Կցորդ՝ Օր. Զարուհի Ներսէսեանը, վարդապետներ, սարկաւագներ, դպիրներ ու հաւատացեալներ: Երեկոյթը ընթացք առաւ Իրագի և Հայաստանի հիմներգներով, որմէ ետք, բացման խօսք արտասանեց Պրն. Ժոզէֆ Պանտալին, ապա Պրն. Ռաուլը ընթերցում կատարեց «Ապրիլ 24» խորագրով: «Կոտորածն անգութ» մեներգով հանդէս եկաւ Օր. Մարիանը: Յաջորդաբար, Եկեղեցւոյ երիտասարդաց խումբի և քրիստոնէականի փոքրիկներու կատարողութեամբ՝ հնչեց «Տէր Զօր» յուզումնալից երգը Օր. Շողիկի ղեկավարութեամբ և արմոնիոմի ընկերակցութեամբ:

«110 տարիներ» խորագրով՝ հայերէն խօսք առաւ Պրն. Շահին Արսլանեանը, ապա փոքրիկներու կողմէ՝ հայերէն ոտանաւորներ կարդացուեցան: Օր. Շահատ արաբերէն ընթերցեց Երանելի Մալոյեանի Վարքը: Ապա, անմահն Կոմիտասի «Տլէ եաման» երգեց Պրն. Ժոզէֆ Պանտալին: Անգլերէն ոտանաւոր կարդաց Օր. Լուսինը: Աւարտին՝ Հ. Մովսէս Վրդ. Տօնանեանը փակման խօսքը կարդաց հայերէն և արաբերէն, որուն յաջորդեց երիտասարդաց խումբի և փոքրիկներու «Թող հնչեն շեփոր» և «Կիլիկիա» երգերը միաշունչ և միահամուռ: Այնուհետեւ, եկեղեցական դասուն, հիւրերուն եւ ժողովուրդին թափօրը, գլխաւորութեամբ Գերապայծառ Հօր՝ շարժեցաւ դէպի Հայոց Ցեղասպանութեան յուշակոթողը, «Այսօր յարեաւ» շարականը եղանակելով: Մանուկները Խաչքարին առջեւ վարդեր և վառած մոմեր զետեղեցին 1,5 միլիոն հայ զոհերու յիշատակին: Խունկ և աղօթք բարձրացան առ Աստուած, երգեցողութիւնը, աղօթքը և խնկարկութիւնը մէջ ընդ մէջ՝ ստեղծեցին խորհրդաւոր մթնոլորտ մը: Այս հոգեպարար արարողութենէն ետք, հոգեւորական դասը, հիւրերն ու հաւատացեալ ժողովուրդը ուղղուեցան Եկեղեցւոյ դահլիճը, ուր յաւուր պատշաճի հիւրասիրութիւն տեղի ունեցաւ