Ռայի Պատրիարք. «Լիբանանը փակեց քաղաքացիական պատերազմի էջը, Եւ այսօր կը փակէ օրինականութենէն դուրս գալու էջը»

Մարոնիներու Ռայի պատրիարքը Ծաղկազարդի տօնի իր քարոզին մէջ նշեց. «Այսօրուան թուականը` 13 ապրիլ 2025-ը Լիբանանի մէջ քաղաքացիական պատերազմի ծագման 50-ամեակն է, եւ ատիկա պատերազմն է, որ լիբանանցիներուն կեանքերը, մանկութիւնն ու երիտասարդութիւնը յօշոտեց, աղաւաղեց Լիբանանի հետ եւ իրարու հետ անոնց յարաբերութիւնները»:

Ան նշեց, որ Լիբանան փակեց քաղաքացիական պատերազմի էջը, եւ այսօր կը փակէ օրինականութենէն դուրս գալու եւ անոր դէմ պայքարելու էջը: Սակայն էջերու փակումը բաւարար չէ, որովհետեւ պէտք է սերտել այն իրողութիւնը, որ երկիրը այս կացութեան հասցուց:

«Ան, որ սխալներէն չի սորվիր, զայն կը կրկնէ, եւ այսուհետեւ կրկնութեան ժամանակ չկայ, որովհետեւ Լիբանանը կարիք ունի իր պատմութեան արժանի ապագայի մը», նշեց Ռայի պատրիարքը:

Ան կոչ ուղղեց վերստին ուսումնասիրելու այն, ինչ տեղի ունեցաւ, եւ հաշտուելու ու անկեղծանալու, որպէսզի շրջանցենք ներկայ փուլը, ինչպէս որ այլ պետութիւններ յաջողեցան այդ մէկը կատարել:

Աղբիւրը` Ազդակ