Haiti, ofensivë bandash. U vranë dy motra rregulltare në Mirabalais

R.SH. - Vatikan

"Ne jemi në luftë". Fjalët e Presidentit të Këshillit Tranzicional, Fritz Alphonse Jean, të raportuara nga shtypi Haitian lënë pak hapësirë për interpretim të asaj që po ndodh në ishullin e Karaibeve. Koalicioni i bandës së Vivre Ensemble sulmoi periferinë e Mirebalais të hënën, rreth gjashtëdhjetë kilometra nga Port-au Prince, dhe pavarësisht ndërhyrjes së forcave të sigurisë, ai ende ruan kontrollin e qytetit.

U vranë dy motra rregulltare

Popullsia në panik vazhdon të largohet nga qyteti duke kërkuar strehim në fshatrat e afërta. Vala e dhunës e deritanishme ka shkaktuar vdekjen e 5 personave, duke përfshirë dy motrat rregulltare të Urdhrit të Shën Terezës, identiteti i të cilave u konfirmua nga kryeipeshkvi metropolitan i Port-au-Prince, imzot Max Leroy Me'sidor, i cili i ka identifikuar si Evanette Onezaire dhe Jeanne Voltaire. Vrasje brutale që kujton vrasjen e motrës Luisa Dell'Orto në vitin 2022 dhe rrëmbimin e 6 murgeshave të tjera, të liruara më vonë, në janar të vitit 2024.