Papa, kryeipeshkvi i Firences: pjesëmarrja e shqiptarëve, fryt i dialogut ndërfetar
R.SH. - Vatikan
"Kremtimi i funeralit të Papës Françesku ishte çast shumë emocionues lutjeje, me pjesëmarrjen e shumë ipeshkvijve, që erdhën nga e gjithë bota. U preka dhe dua të kujtoj në veçanti fjalët e homelisë së kardinalit Giovanni Battista Re, i cili nënvizoi se mëshira është në qendër të magjisterit të Papës Françesku, zemra pulsante e Ungjillit. Gjithashtu, përmendi edhe përkushtimin e tij për dialogun ndërfetar, me udhëtimin në Emiratet e Bashkuara Arabe dhe nënshkrimin e dokumentit mbi 'Vëllazërimin Njerëzor për Paqen Botërore dhe Jetën e Përbashkët', ose me udhëtimin e tij në Irak. Fjalët e Papës për paqen kanë qenë gjithnjë shumë të fuqishme, thoshte se lufta e lë gjithmonë botën më keq se më parë, se luftërat janë gjithmonë disfatë. Të gjithëve ne, që ruajmë kujtimin e Tij, na takon një impenjim konkret për paqen".
Ky, mendimi i kryeipeshkvit të Firences, imzot Gherardo Gambelli, në fund të Meshës së djeshme të Dritës për Papës Françesku. Në funeralin e kremtuar në Sheshin e Shën Pjetrit, po nga Firence, erdhën edhe kardinali Giuseppe Betori dhe kardinali shqiptar Ernest Simoni, të dy të inkardinuar në dioqezën italiane.
“Pata përshtypjen se ishte pothuajse një provë gjenerale për një Koncil”, deklaroi kryeipeshkvi i Firences. "Po përgatitemi për Asamblenë kishtare të vitit 2028 dhe kjo na predispozon edhe për një Koncil të ri, që mund të jetë vërtet një moment i çmuar dhe i rëndësishëm për ta jetuar me një besnikëri më të madhe Ungjillin, gjë që Papa Françesku na e ka mësuar gjatë gjithë këtyre viteve".
“Më 25 prill - shtoi kryeipeshkvi Gambelli - mbërritëm pasdite në Bazilikën e Shën Pjetrit së bashku me kardinalin Ernest Simoni për t'u lutur dhe për t'i bërë homazhe Papës Françesku. Këtu takuam Presidentin e Republikës së Shqipërisë, të shoqëruar nga një delegacion ndërfetar, ku bënin pjesë kryeipeshkvi metropolit i Tiranë-Durrësit, krerë të Kishave të tjera të krishtera dhe krerët e bashkësive myslimane të Shqipërisë. Ishte çast intensiv: edhe nga kjo pjesëmarrje mund të shohim frytet e magjisterit të Papës, aftësinë e tij për të favorizuar dialogun me të gjithë”.
