Liturgiya oxunuşları:26 MART. Böyük Orucun III həftəsi, çərşənbə

“Məsih sadəcə olaraq normalara və zahiri ədəb-ərkana riayət etməklə kifayətlənmir; O, Qanunun kökünə baxır, ilk növbədə niyyətə və, deməli, yaxşı və pis əməllərimizin qaynaqlandığı insanın qəlbinə diqqət yetirir” (Papa Fransisk, “Rəbbin mələyi” 16.02.2014).

BİRİNCİ OXUNUŞ Qanunun təkrarı 4, 1.5-9

İndi, ey İsraillilər, sizə öyrədəcəyim qaydalara və hökmlərə qulaq asın. Onlara əməl etsəniz, yaşayacaqsınız, atalarınızın Allahı Rəbbin sizə verəcəyi torpağa daxil olub oranı irs olaraq alacaqsınız. Baxın Allahım Rəbbin mənə əmr etdiyi qayda və hökmləri sizə öyrətmişəm ki, mülk olaraq almaq üçün daxil olacağınız torpaqda bunlara əməl edəsiniz. Onlara diqqətlə riayət edin. Bu, digər xalqlara nə qədər müdrik və aqil olduğunuzu göstərər. Onlar bu qaydaları eşidəndə deyəcəklər ki, bu böyük millət, həqiqətən, müdrik və aqil bir xalqdır! Allahımız Rəbb hər dəfə dua edərkən bizə yaxın olar. Axı hansı millət belə üstündür ki, Allahı ona bu cür yaxın olsun? Hansı millət belə üstündür ki, bu gün qarşınıza gətirdiyim bu Qanun kimi ədalətli qaydalara və hökmlərə malik olsun? Ancaq diqqətli olun. Gözünüzlə gördüklərinizi unutmamaq və ömür boyu yaddan çıxarmamaq üçün böyük səy göstərin. Bunları övladlarınıza, nəvələrinizə öyrədin.

Təfsir

Musa xalqı hikmət və dərrakə ilə Allahın qanununa riayət etməyə çağırır və xatırladır ki, bu qanun azadlığı məhdudlaşdırmır, əksinə onu istiqamətləndirir. Allahın Əmrlərini yerinə yetirmək heç də yük deyil, mətnin özündə vurğulandığı kimi, dolğun həyata aparan yoldur: “onlara əməl etsəniz yaşayacaqsınız”. Allahın Qanunu insanın və xalqın yolunu işıqlandıran bir nur kimi bəxş olunur. Onun yerinə yetirilməsi xalqlar qarşısında böyük şəhadətdir. Qanunu və öz ruhunu qorumaq üçün əsas odur ki, Allahın xeyir işlərini unutmayasan. Ruhani yaddaş bizi Rəbblə canlı əlaqədə saxlayır, çünki unutqanlıq imanın zəifləməsinə, sonra isə mənəvi süstlüyə səbəb olur. Buna görə də Musa təkid edir: “Bunları övladlarınıza, nəvələrinizə öyrədin”. İman təkcə şəxsi təcrübə deyil, həm də onu gələcək nəsillərə ötürmək məsuliyyətidir. Məzmurçu bəyan edir: “Rəbbə həmd et, ey Yerusəlim; Allahına həmd et, ey Sion.” Qoy bizim oruc səyahətimiz Allaha həyatımızda verdiyi xeyir-dualara görə həmd etmək vaxtı, Onun varlığının və sarsılmaz sədaqətinin xatirəsini təzələmək vaxtı olsun.

İNCİL Matta 5,17-19

Sanmayın ki, Mən Qanun və Peyğəmbərlərin sözlərini ləğv etmək üçün gəldim. Mən onları ləğv etmək üçün yox, yerinə yetirmək üçün gəldim. Sizə doğrusunu deyirəm: göy və yer keçib getmədən, hər şey icra olmadan Qanundan ən kiçik bir hərf və ya bir nöqtə belə, yox olmayacaq. Beləliklə, bu əmrlərdən ən kiçiyindən birini kim pozarsa və başqalarına da bu cür öyrədərsə, Səmavi Padşahlıqda ən kiçik sayılacaq. Amma kim bu əmrləri yerinə yetirər və başqalarına da öyrədərsə, Səmavi Padşahlıqda böyük sayılacaq. Sizə bunu deyirəm: əgər sizin salehliyiniz ilahiyyatçılarla fariseylərin salehliyindən artıq olmasa, Səmavi Padşahlığa əsla girə bilməzsiniz.

Təfsir  

Rəbb İsa Məsih qanunu və ya peyğəmbərləri ləğv etmək üçün deyil, onları yerinə yetirmək üçün gəldi. O, Qanunun canlı yerinə yetirilməsidir, çünki Əhdi-Ətiqin bütün göstərişləri və peyğəmbərlikləri Onda öz dolğunluğunu tapır. Bununla Məsih göstərir ki, qanun ölü qaydalar toplusu deyil, insanı xilasa aparan Allahın iradəsinin ifadəsidir. Qanun bəzən azadlığın məhdudlaşdırılması kimi qəbul edilir, lakin sevgi kimi azadlığın da öz qaydaları var. Əsl azadlıq özbaşınalıq deyil, yaxşılığa əməl etmək və buna görə də Allahın əmrlərinə sadiq olmaqdır. Onlara formal olaraq deyil, bütün ürəklə riayət edilməlidir, çünki xristian həyatına gözəllik və nizam bəxş edən - Allahın qanunlarına sadiqlikdir. Təbii ki, bu yol zəhmət və fədakarlıq tələb edir, çünki əsl sevgi təbiətcə tələbkardır. Məsih vurğulayır ki, hətta “ən kiçik” əmrləri yerinə yetirmək vacibdir. Bu, mənəvi həyatın bütövlüyünü təşkil edən kiçik şeylərdə sədaqətə çağırışdır. Bu, Rəbb ilə münasibətlərdə də belədir: burada güzəştə yer yoxdur, lakin Məsihin yolu ilə getmək üçün dərin inam və qətiyyət tələb olunur. Seçim bizimdir - bu yolu qəbul etmək və ya ondan imtina etmək.