Liturgiya oxunuşları: 9 APREL. Böyük Orucun V həftəsi, çərşənbə
BİRİNCİ OXUNUŞ Daniel 3,14-20.91-92.95
Navuxodonosor onlara dedi: «Ey Şadrak, Meşak və Aved-Neqo, bu doğrudur ki, siz mənim allahlarıma qulluq etmirsiniz? Mənim qoyduğum qızıl heykələ səcdə etmirsiniz? Yaxşı olar ki, indi şeypur, zurna, lira, arfa, səntur, tuluq zurnası və hər cür musiqi alətlərinin səsini eşidən zaman yerə əyilib düzəltdiyim heykələ səcdə edəsiniz. Əgər səcdə etməsəniz, o saat odla qızmış sobaya atılacaqsınız. O zaman sizi hansı allah mənim əlimdən qurtara bilər?» Şadrak, Meşak və Aved-Neqo padşaha cavab verdi: «Ey Navuxodonosor, bizim bu iş üçün sənin önündə özümüzü müdafiə etməyimizə ehtiyac yoxdur. Ey padşah, əgər belə olsa, qulluq etdiyimiz Allahımız bizi odla qızmış sobadan xilas etməyə qadirdir və sənin də əlindən qurtaracaq. Sənə məlum olsun ki, ey padşah, əgər belə olmasa da, biz sənin allahlarına qulluq edən deyilik və sənin qoyduğun qızıl heykələ də səcdə etməyəcəyik». O zaman Navuxodonosor bərk qəzəbləndi və Şadraka, Meşaka, Aved-Neqoya qarşı siması dəyişdi. O əmr etdi ki, sobanı adətən qızdırdıqlarından yeddi dəfə artıq qızdırsınlar. Ordusunun ən güclü əsgərlərinə əmr etdi ki, Şadrakın, Meşakın və Aved-Neqonun əl-qolunu bağlayıb onları odla qızmış sobaya atsınlar. O zaman padşah Navuxodonosor heyrətə gəlib tez ayağa qalxdı və öz müşavirlərinə dedi: «Biz üç nəfər əl-qolu bağlanmış adamı oda atmadıqmı?» Onlar cavabında padşaha dedi: «Doğrudur, ey padşah!» O dedi: «Budur, mən odun içində əl-qolu bağlanmamış dörd nəfərin gəzdiyini görürəm və onlara heç nə olmur. Onlardan dördüncüsü allahların oğluna bənzəyir». Onda Navuxodonosor dedi: «Şadrakın, Meşakın və Aved-Neqonun Allahına şükür olsun ki, Öz mələyini göndərib Ona arxalanan qullarını xilas etdi. Onlar padşahın əmrinə qarşı çıxıb özlərini qurban vermək istədilər ki, özlərinin Allahından başqa bir allaha qulluq yaxud səcdə etməsinlər.
Təfsir
Bu günlərin oxunuşları - bazar ertəsi Susanna haqqında, çərşənbə axşamı Çıxışda olan xalq haqqında və bu gün sobadakı üç gənc haqqında - imanlılara bütləri rədd edərək bir Allaha ümid etməyə kömək edir. Mətn bu hadisənin bir çox təfərrüatlarını təqdim edərək, təzadları daha da təntənəli edir və beləliklə, Uca Yaradanın əzəmətini tərənnüm edir; Sonda padşah deyir: “Şadrakın, Meşakın və Aved-Neqonun Allahına şükür olsun”. Qoy bu üç gəncin şəhadəti – bir çox müasir şəhidlərin şəhadəti kimi – yeganə Rəbbimiz və Xilaskarımız olan İsaya olan bir imanda möhkəm qalmağa və Məzmurun sözləri ilə nida etməyə kömək etsin: “Ey Rəbb Allah, Sənə alqış olsun”.
İNCİL Yəhya 8,31-42
O zaman İsa Ona inanmış Yəhudilərə dedi: «Əgər siz Mənim sözümə sadiq qalsanız, həqiqətən, Mənim şagirdlərimsiniz. Onda siz həqiqəti biləcəksiniz və həqiqət sizi azad edəcək». Yəhudilər İsaya cavab verdilər: «Biz İbrahimin nəslindənik, heç kəsə heç vaxt kölə olmamışıq. Bəs Sən niyə “azad olacaqsınız” deyirsən?» İsa onlara dedi: «Doğrusunu, doğrusunu sizə deyirəm: günah edən hər kəs günahın köləsidir. Kölə evdə daim qalmaz, oğulsa daim qalar. Buna görə də əgər Oğul sizi azad etsə, həqiqətən də, azad olacaqsınız. İbrahimin nəslindən olduğunuzu bilirəm, ancaq bununla belə, Məni öldürməyə çalışırsınız. Çünki Mənim sözüm sizin ürəyinizdə yer tapmır. Mən Atanın yanında gördüklərimi söyləyirəm, sizsə öz atanızdan eşitdiklərinizi† yerinə yetirirsiniz». Onlar İsanın cavabında «bizim atamız İbrahimdir» dedilər. İsa onlara dedi: «İbrahimin övladları olsaydınız, İbrahimin etdiyi əməlləri edərdiniz. Sizsə indi Məni – Allahdan eşitdiyi həqiqəti sizə söyləyən Adamı öldürməyə çalışırsınız. İbrahim belə etmədi. Siz öz atanızın əməllərini edirsiniz». Ona dedilər: «Biz zinadan doğulmamışıq, bizim bir Atamız var, O da Allahdır». İsa onlara dedi: «Əgər Allah sizin Atanız olsaydı, Məni sevərdiniz, çünki Mən Allahdan çıxıb gəlmişəm və indi buradayam. Mən Özümdən gəlmədim, lakin O Məni göndərdi.
Təfsir
Bugünkü İncilin mətni İsa və onun əleyhdarları arasında başqa bir mübahisəni təqdim edir, bu mübahisənin mahiyyəti bu gün “oğulluq” mövzusundadır. Məsihin sözlərinə cavab olaraq ağsaqqallar bəyan edirlər ki, onlar “İbrahimin nəslindəndirlər” və heç vaxt qul olmayıblar. Bununla belə, İsa xatırladır ki, uyğun hərəkət etmədən özünü “nəsil” və ya “oğullar” adlandırmaq kifayət deyil: özlərini İbrahimin övladları adlandıranlar İbrahimin işlərini görməli və Məsihi öldürməyə cəhd etməməlidirlər. Azad insan Allahı Ata kimi tanıyır və Onun göndərdiyi İsanı sevir. Azadlıq mövzusu həmişə bəşəriyyəti maraqlandırıb, lakin onu səhv başa düşmək riski var. İnsan Allah tərəfindən sevildiyini hiss etdiyi və Ona ehtiyacı olduğunu anladığı qədər azaddır. Biz Allahın sevimli evladları olduğumuzu anladıqda azad oluruq. Biz Səmavi Atamızın bizdən gözlədiklərini etməyi öyrənəndə, Rəbbdən bizi günahın bağlarından və pis meyllərdən azad etməsini istəyəndə azad oluruq.
