Sant’Egidio Cəmiyyəti İtaliyada 700 Əfqan qaçqının qəbuluna kömək edir
Debora Kastellano Lubov tərəfindən
Çəkdikləri böyük əzablardan sonra, 700 əfqan qaçqını, Sant’Egidio Cəmiyyətinin uzun müddətdir davam edən “humanitar dəhlizlər” proqramı çərçivəsində, İtaliya hökuməti və müxtəlif İtaliya və İtaliyada yerləşən beynəlxalq təşkilatlarla əməkdaşlıq nəticəsində İtaliyada qəbul ediləcəklər.
Cəmiyyətin yaydığı mətbuat açıqlamasında, cəmiyyətin prezidenti Marko İmpalyatso dedi: “2021-ci ilin avqust ayında Kabildən kütləvi qaçışdan sonra böyük çətinliklərlə ölkələrini tərk etməyə məcbur qalan və yerləşdirilməyi gözlədikləri müddətdə beynəlxalq ictimaiyyət tərəfindən unudulan əfqanlar üçün bu, nəhayət ki, bir ümid işığıdır.”
Ümumilikdə, Sant’Egidio və müxtəlif təşkilatlar tərəfindən təşviq edilən “humanitar dəhlizlər” təşəbbüsü 8200 qaçqının Avropaya təhlükəsiz şəkildə çatmasına imkan verib.
Tamamilə öz maliyyəsi ilə həyata keçirilən bu layihə, bir çox İtaliya vətəndaşının səxavəti ilə dəstəklənən geniş bir qonaqpərvərlik şəbəkəsi vasitəsilə reallaşır və həmrəylik ilə təhlükəsizliyi birləşdirən uğurlu bir model nümayiş etdirir.
Üstəlik, bu sazişin Əfqan qaçqınlarının İtaliyaya asanlıqla qəbuluna yardım məqsədi daşıması cənab İmpalyatsoya görə xüsusilə əhəmiyyətlidir, çünki bu, “millətlər arasında müharibələrin və gərginliklərin narahatedici şəkildə artdığı bir dövrə təsadüf edir” və “qaçqınların qarşılanması və inteqrasiyası üçün model olaraq humanitar dəhlizlərin əhəmiyyətini vurğulayır.”
Cəmiyyət prezidentinin bu açıqlamaları sazişin bazar ertəsi günü günortadan sonra İtaliyanın Daxili İşlər Nazirliyində imzalanmasından sonra səsləndirilib. Bu saziş İtaliyanın, xüsusilə Daxili İşlər və Xarici İşlər Nazirliklərinin, eləcə də İtaliya Yepiskoplar Konfransı, Sant’Egidio Cəmiyyəti, Kilsə və beynəlxalq təşkilatların iştirakı ilə imzalanıb.
Bu Saziş, 2021-ci ilin noyabrında imzalanmış və nəticəsində 812 əfqan vətəndaşının gəlməsinə və təşkilatlar tərəfindən qarşılanıb inteqrasiya edilməsinə imkan vermiş əvvəlki sazişə əlavədir.
İtaliya artıq bu şəxslərin 338-nin ölkəyə girişinə icazə verib, qalan 362 qaçqın isə sazişin rəsmi qüvvəyə minməsindən sonra — sazişin imzalandığı tarixdən iyul ayınadək olan müddətdə — ölkəyə daxil ola biləcək.
