Papa: "Doğulmamış uşaq səsi olmayan hər bir insanı təmsil edir"
Devid Uotkins tərəfindən
Romanın Cemelli xəstəxanasında ikitərəfli pnevmoniyadan müalicə alarkən Papa Fransisk İtaliyanın “Həyat naminə Hərəkatı”-nın təşkil etdiyi zəvvarlıq səfərinin iştirakçılarına müraciət göndərib.
Şənbə günü, Müqəddəs Peter Bazilikasında toplaşan zəvvarlara müraciəti Papanın adından Dövlət Katibi kardinal Pietro Parolin oxuyib.
O, müasir cəmiyyətin “sahibçilik, fəaliyyət, istehsal və görünüş” ilə qadınlara göstərdiyi təzyiqlərdən təəssüfləndiyini bildirib. Papa əlavə edib ki, Kilsə insan şəxsiyyətinin ləyaqətini təbliğ etməklə və dünyanın gözündə ən zəif olanlara üstünlük verməklə cəmiyyətin bu təzyiqlərinə qarşı durmağa çalışır.
Papa Fransisk xristianları, qadınları “uşaqlarını dünyaya gətirməməyə məcbur edən təzyiqlərdən” azad edən “sevgi sivilizasiyasını” inkişaf etdirməyə çağırıb. O, doğulmamış uşaqları "bizdən biri" kimi tanımaq üçün "qəlbin baxışına" ehtiyac olduğunu söyləyib.
Papa daha sonra 1975-ci ildə yaradılan, çətin hamiləlik keçirən və ya abort etmək üçün təzyiqə məruz qalan qadınlara yardım edən bir neçə mərkəzə rəhbərlik edən İtaliyanın “Həyat naminə Hərəkatı”-nın fəaliyyətini tərifləyib. “Onların fəaliyyəti açıqlıq, sevgi və əzmlə həqiqəti mərhəmətlə sıx birləşdirərək həyat mədəniyyətinin formalaşmasını təşviq edir.”, -deyə Papa müraciətində vurğulayıb. Hərəkatın 50 illik yubileyi münasibətilə Papa Fransisk, həyatı təşviq etmək istəyənlərin hamısını “analığın sosial müdafiəsini və onun bütün mərhələlərində insan həyatının qəbulunu təşviq etməyə” çağırıb.
Roma Papası hər kəsi özünü insan həyatına, xüsusən də onun ən kövrək və həssas olduğu vaxtda, xidmət etmək üçün həsr etməyə çağırıb.
Papa: “Həyat müqəddəsdir, Allah tərəfindən böyük və gözəl bir tale üçün yaradılmışdır. Ədalətli cəmiyyət arzuolunmaz uşaqları, artıq özünü təmin edə bilməyən qocaları və ya ölümcül xəstələri rədd etməklə qurulmaz”.
Sonda Papa Fransisk dua etdi ki, Müqəddəs Məryəmin şəfaəti həyatı təbliğ edənlərin üzərində olsun və onlardan onun üçün və səhhəti üçün dua etmələrini xahiş etdi.
