Papa Fransisk: Gəlin Rəbbi Məryəm və Yusif kimi ümidlə axtaraq
MÜQƏDDƏS ATA TƏRƏFİNDƏN HAZIRLANMIŞ KATEXİZİS
Çərşənbə, 05 mart 2025
Yubiley 2025 – Katexizis silsiləsi. İsa Məsih bizim Ümidimizdir. I. İsanın körpəliyi. 8. “Oğlum, bu nədir başımıza gətirdin?” (Lk 2, 48). İsanın Məbəddə tapılması
Əziz bacılar və qardaşlar, sabahınız xeyir!
İsanın uşaqlığına həsr olunmuş bu sonuncu katexizisdə biz Onun on iki yaşında ikən, Onu böyük həyəcan ilə axtaran və üç gündən sonra tapan valideynlərinə heç nə demədən Məbəddə qalması epizodundan başlayacağıq. Bu hekayə bizə Məryəm və İsa arasında çox maraqlı bir dialoq təqdim edir və bu bizə İsanın anasının heç də asan olmayan yolu haqqında düşünməyə kömək edir. Həqiqətən də, Məryəm Oğlunun sirrini başa düşmək üçün ruhani bir səyahətə çıxdı.
Ümidin zəvvarı Məryəm
Gəlin bu səyahətin müxtəlif mərhələlərinə nəzər salaq. Hamiləliyinin əvvəlində Məryəm Elizabetə baş çəkir və üç ay, kiçik Yəhyanın dünyaya gəlməsinə qədər onunla qalır. Məryəm hamiləliyinin doqquzuncu ayında olanda, siyahıyaalma ilə əlaqədar Yusiflə birlikdə Betlehemə gedir. Orada İsanı dünyaya gətirir. Qırx gündən sonra onlar uşağı Məbəddə təqdim etmək üçün Yerusəlimə gedirlər. Və bundan sonra hər il Məbədi ziyarət etmək üçün qayıdırlar. Lakin İsa hələ körpə ikən, Onu Hiroddan qorumaq üçün, onlar uzun müddət Misirə sığınmışdılar və yalnız padşahın ölümündən sonra yenidən Nazaretdə məskunlaşdılar. İsa yetkinləşərək xidmətə başlayanda Məryəm Qanadakı toyda iştirak edir və hadisənin baş qəhrəmanıdır. Sonra o, İsanın Yerusəlimə son səyahətinə qədər və Onun əzabları və ölümünə qədər, Onun ardınca “məsafədən” gedir. Dirilmədən sonra Məryəm şagirdlərin anası kimi Yerusəlimdə qalır və Müqəddəs Ruhun enməsini gözləyərək imanlarını qoruyur.
Bu səyahət boyu Məryəm ümidin zəvvarıdır, daha güclü mənada O, “Oğlunun qızına”, Onun şagirdlərinin birincisinə çevrilir . Məryəm bəşəriyyətin Ümidi olan İsanı dünyaya gətirdi; Onu qidalandırdı, böyütdü, Onun ardınca getdi və Allahın Kəlamı ilə formalaşan ilk şəxs olmağa özünə icazə verdi. XVI Benediktin dediyi kimi, “Biz Məryəmin özünü Allahın Kəlamı ilə tamamilə ahəngdə hiss etdiyini görürük... biz onun fikirlərinin Allahın düşüncələrinə necə uyğunlaşdığını, onun iradəsinin Allahın iradəsi ilə necə bir olduğunu görürük. Məryəm Allahın Kəlamı ilə tamamilə aşılandığı üçün o, Mücəssəm Kəlamın Anası olmağa qadirdir” (Deus caritas est, 41). Bununla belə, Allahın Kəlamı ilə bu bənzərsiz ünsiyyət onu “şagirdlik” səylərindən azad etmir.
Mübarək Ananın Oğlunu itirmək qorxusu
On iki yaşlı İsanın Yerusəlimə illik ziyarəti zamanı itkin düşməsi Məryəmi o qədər qorxudur ki, o, oğlunu geri götürən zaman Yusifin adından da danışır: “Oğlum, bu nədir başımıza gətirdin? Atanla mən nigaran qalıb səni axtarırdıq” (Lk 2, 48). Məryəm və Yusif itkin uşağı olan valideynlərin ağrısını hiss etdilər: hər ikisi İsanın qohumları ilə birlikdə karvanda olduğunu düşünürdülər, lakin bütün gün Onu görmədikdən sonra addımlarını geri çəkməyə vadar edəcək axtarışlara başladılar. Məbədə qayıtdıqdan sonra onlar kəşf etdilər ki, onların nəzərində, hələ qorunmalı uşaq olan O, birdən böyümüş kimi görünür və indi O Müqəddəs Yazılar üzrə müzakirələrə qoşulmağa, Qanun müəllimləri qarşısında Öz fikrini müdafiə etməyə qadirdir.
İnsan zəkasını üstələyən Sirr
Anasının məzəmməti ilə üzləşən İsa tərksilahedici sadəliklə cavab verir: “Məni nə üçün axtarırdınız? Məgər bilmirdiniz ki, Mən Atamın evində olmalıyam?” (Lk 2, 49). Məryəm və Yusif başa düşmürlər: Uşaq olmuş Allahın sirri onların ağıllarını aşır. Valideynlər o qiymətli oğlunu sevgilərinin qanadları altında qorumaq istəyirlər. Bunun əvəzinə İsa Öz vəzifəsini Atanın xidmətində olan və Onun Kəlamına qərq olunmuş Atanın Oğlu kimi yaşamaq istəyir.
Beləliklə, Lukanın körpəlik hekayələri Məryəmin Yusifin İsanın atalığını xatırladan son sözləri və İsanın bu atalığın Onun şübhəsiz üstünlüyünü etiraf etdiyi səmavi Atasından qaynaqlandığını bildirən ilk sözləri ilə yekunlaşır.
Əziz qardaş və bacılar, Məryəm və Yusif kimi ümid dolu, gəlin biz də Özünü əmrlərimizlə məhdudlaşdırmağa imkan verməyən və Özünü bir məkandan daha çox zərif ilahi atalığa məhəbbətin cavabında, övlad həyatı olan məhəbbətin cavabında tapmağa imkan verən Rəbbin izi ilə gedək.
