Xalqın Papası: Sürünün qoxusunu üzərində daşıyan çoban
Devin Uotkins tərəfindən
Papa Fransisk insanların bir yerdə olmağını sevirdi. Bunu hər çərşənbə səhəri keçirilən Ümumi Audiensiyalarda görmək olurdu. Hətta bazar günləri günorta vaxtı Vatikanın Apostol Sarayındakı ofisinin pəncərəsindən görünəndə də bu hiss olunurdu. O, aşağıdakı Müqəddəs Peter Meydanına baxaraq həvəslə əl yelləyər və Vatikanı ziyarət edən saysız-hesabsız katolik qruplarını salamlayardı.
O, hər zaman insanların yanında olmaq istəyirdi və bu arzu onu, demək olark ki, dünyanın hər yerinə, 47 Apostol Səfəri etməyə sövq etdi.
Lakin mərhum Papa Fransiskin insanlara olan sevgisi ən çox fiziki ayrılığın zəruri olduğu anda daha da aydın hiss olunurdu.
Bir mənada, Covid-19 pandemiyası onu Vatikanda qapatdı – sanki 19-cu və 20-ci əsrin əvvəllərində Vatikan şəhər-dövləti hələ mövcud deyildi deyə, seçildikdən sonra demək olar ki, məcburi şəkildə Vatikan daxilində qalmalı olan papalar kimi.
Ancaq başqa bir baxımdan, argentinalı Papa Vatikanın Leonin Divarlarının arxasında qalmaqdan imtina etdi. O, müasir kommunikasiya vasitələrindən istifadə edərək, evlərində qorxu içində oturan insanlara – tanınmayan bir xəstəliyin yayılmasından ehtiyat edənlərə – ümid verməyə çalışdı.
Hər səhər saat 06:00-da Papa Fransisk öz yaşayış yeri olan Casa Santa Marta’dakı kiçik ibadətgahda Müqəddəs Messa icra edirdi. Bu messalar Sosial şəbəkələr, televiziya və radio vasitəsilə Vatikan News-un da daxil olduğu Kommunikasiya üzrə Dikasteriya tərəfindən dünya üzrə yayımlanırdı.
Hər dəfə o, koronavirusun müxtəlif sahələrə təsir etdiyi insanlara dua edirdi – tibb bacılarından tutmuş müəllimlərə, həbsxanadakı məhkumlara qədər.
Filippindəki katoliklər naharlarını bitirdikləri, Kaliforniyada isə insanlar yatmağa hazırlaşdıqları anda, Papa milyonlarla insanın evinə sanki daxil olur və onlara, nə qədər qorxmuş olsalar da, tək olmadıqlarını xatırladırdı.
Sonra, 27 mart 2020-ci ildə, o, tarixdə ilk dəfə olaraq “Statio Orbis” adlı bir ibadət təşkil etdi – yağışlı bir axşamda, boş Müqəddəs Peter Meydanında təkbaşına dayanaraq. Müqəddəs Sakramentlə bütün dünyaya xeyir-dua verdi – ümidsizliyin hökm sürdüyü bir anda, İsa Məsihin yeganə həyat və ümid mənbəyi olduğunu göstərdi.
Zaman keçdikcə, insanlar yenidən çölə çıxmağa başladılar və Papa da həftəlik audiensiyalarını və müxtəlif qruplarla özəl görüşlərini bərpa etdi. Romada yenidən izdihamlı görüntülər adi hala çevrildi və həmin ayrılıq dövrləri Papa Fransiski insanlara daha da yaxın olmağa vadar etdi.
Rəsmi səfərlərlə gələn dövlət başçıları ilə yanaşı, dünyanın dörd bir yanından gəlmiş məşhurlar da Papa ilə görüşmək, onunla xoş vaxt keçirmək və ya əlini sıxmaq üçün Vatikanı ziyarət edirdilər.
O, “Rokki” filminin ulduzu Silvestr Stallone ilə zarafatla bokslaşdı və aktyorun üç qızını Müqəddəs Kitabda adı keçən üç Məryəmə bənzətdi.
“Terminator”un ulduzu Arnold Şvartsenegger ilə əl sıxışdı və aktyor ona ətraf mühitin qorunmasına verdiyi dəstəyə görə təşəkkür etdi.
Son zamanlar isə dünyanın müxtəlif yerlərindən gəlmiş bir qrup komediyaçı ilə görüşdə Papa onlara xatırlatdı ki, gülüş və zarafat ruhu yüksəldir, gərginliyi azaldır.
Lakin mərhum Papa Fransiskə 12 il boyunca Katolik Kilsəsini idarə etmək gücünü verən, əslində məhz sadə insanlarla – adi kişilər və qadınlarla – birbaşa təmas idi.
Ümumi Audiensiyalar zamanı papamobildən enib səhnəyə çıxarkən, xalqın Papası Fransisk həmişə dayanaraq, Müqəddəs Peter Meydanında və ya VI Paul Zalında onun sözlərinin hər kəs tərəfindən anlaşılması üçün müxtəlif dillərdə xülasələr və salamlama mətnləri oxuyan Vatikan əməkdaşlarını səmimi şəkildə salamlayırdı.
Hətta o qısa söhbətlər zamanı belə, onların xəstə valideynlərinin vəziyyəti ilə maraqlanır, yeni evlənmiş bir cütlüyün bal ayından sonra doğrudan da işə qayıdıb-qayıtmayacağını zarafatla soruşurdu və ya saqqalı səliqəsiz olan bir oxucunun görünüş seçimini zarafatla sorğulayırdı.
Bu şən və ya ciddi anlarda belə, mərhum Papa Fransisk görüşdüyü insanların həyatına böyük maraq göstərirdi. Və heç vaxt unutmurdu: bütün keşişlər “sürünün qoxusunu üzərində daşıyan çobanlar” olmalıdır.
