Kuriyanın ruhani məşğələləri: “Əbədi istirahət”

Papa Sarayının vaizi Roberto Pazolini (OFM Cap) Roma Kuriyasının 2025-ci ildəki ruhani məşğələləri üçün "Əbədi istirahət" mövzusunda düşüncələrini təqdim edib.

Roberto Pazolini (OFM Cap) tərəfindən

Əbədi həyat artıq mövcud olan bir hədiyyədir, lakin biz çox vaxt onun əsas aspektini – əbədi istirahəti - başa düşməkdə çətinlik çəkirik.  Kiçik yaşlarımızdan biz bu dua ilə tanış oluruq: Ya Rəbb, onlara əbədi istirahət bəxş et, qoy onlara əbədi nur saçsın. Rahat yatsınlar. Amin”.

Əbədi istirahətə əsaslanan əbədiyyət ideyası məyusedici görünə bilər, sanki həyat sonsuz yuxu ilə bitir. Ancaq bu qavrayış dərin bir anlaşılmazlıqdan irəli gəlir: biz istirahəti yalnız hərəkətsizlik kimi görürük, halbuki Bibliyanın baxışında bu dolğunluq və murada çatmaq vəziyyətidir.

İsa çarmıxa çəkiləndən sonra məzara qoyulanda Allahın Özü istirahət təcrübəsini yaşadı. Bu an mükəmməl ətalət anı deyil, bir işin yerinə yetirilməsidir, çünki Müqəddəs Şənbə gününə aid olan qədim bir xütbə mətnində deyilir: " Allah bədəndə öldü və cəhənnəm səltənətini sarsıtmaq üçün endi."

Məsih istirahət edir, lakin cəhənnəm məhbuslarını azad edərək sirrli şəkildə hərəkət edir. Bu, bizə öyrədir ki, dayanmaq - faydasız olmaq demək deyil, əksinə, çılğın və nəticəsiz fəaliyyətin arxasınca qaçmadan zamanı inamla qəbul etməkdir.

Bu gün istirahət - unudulmuş bir lüksdür. Biz elə bir cəmiyyətdə yaşayırıq ki, bizdən həmişə fəal olmağı, daim əlaqədə olmağı, məhsuldar olmağı tələb edir. Bununla belə, imkanlarımız nə qədər geniş olsa, biz bir o qədər az istirahət edirik. İşlədikdən sonra mükafat gözləməyən, sadəcə ona tapşırılan işi yerinə yetirdiyini qəbul edən xidmətçi məsəli bizə mühüm bir sirri öyrədir. Nə qədər ki biz nəticələrin vəsvəsəsi ilə yaşayırıq, heç vaxt istirahət tapa bilməyəcəyik Yalnız məhdudiyyətlərini sakitcə qəbul edənlər, nəhayət, dayanıb istirahət edə bilərlər.

Əsl istirahət fəaliyyətsizlik deyil, azadlıqdır: özümüzü Allahın məhəbbətinə təslim etdiyimiz üçün artıq heç nəyi sübut etməməliyik. Bu, bizə bu sözləri deməyə imkan verən daxili rahatlıqdır: “Allah Öz işlərini qurtarıb…istirahət etdiyi kimi Onun rahatlıq diyarına girən də öz işlərini qurtarıb istirahət etdi.” (İbranilərə 4:10).

Yaxşı istirahət etmək, əbədi həyat üçün məşq etmək, qorxmadan yaşamağı öyrənmək, artıq olanı buraxmaq və Allahın artıq bizdə işlədiyinə inanmaq deməkdir.

Əsl istirahət daxili rahatlıqdır; nəticələrlə deyil, həyatın bizə verdiyini qəbul etmək bacarığı ilə ölçülür. Bu, reallıqdan qaçış deyil, narahat olmadan daha fəal yaşamağı öyrənmək üçün bir yoldur. Bizi, sevə bilməyimiz üçün azad edən passivlik deyil, aktiv inamdır.

“Məhəbbətdə qorxu yoxdur, əksinə, kamil məhəbbət qorxunu qovar.” (1 Yəhya 4,18).

Nəhayət, əbədi həyat uzaq hədəf deyil, artıq içimizdə böyüyən reallıqdır. Hətta indi də biz onu yaşamağa çağırılırıq.