Rəbbin Son Şam Süfrəsi Messası: Qoy biz də İsa kimi Yevxaristiya xalqı olaq
Françeska Merlo tərəfindən
Müqəddəs Cümə Axşamı, Rəbbin Son Şam Süfrəsi liturgiyası ilə başa çatdı. 17 aprel tarixində Müqəddəs Peter Bazilikasında Messaya başçılıq edən kardinal Mauro Qambetti möminləri ilk yəhudi Pasxası üzərində düşünməyə dəvət etdi.
Müqəddəs Peter Bazilikasının Kardinal Baş Keşişi möminləri xristian sirrinin mərkəzinə - ayaqlarımızı yumaq üçün əyilən Allaha qayıtmağa çağırdı.
İlk Yevxaristiya
2025-ci ilin Triduumunu (Müqəddəs Pasxa Üçgünlüyü) açan Son Şam Süfrəsi Messasında kardinal qeyd etdi ki, ilk Pasxa zəfər anında deyil, əksinə “əsarət, zülm və iztirab içində” baş verdi. O, Çıxış kitabından sitat gətirərək, Allahın Musaya dediyi sözləri xatırlatdı: “Qanı gördükdə yan keçəcəyəm.” Beləliklə, İsraillilərin qapı dirəklərindəki qan yalnız qoruma işarəsi deyil, həm də cəzalandırmaq əvəzinə qoruyan ilahi yaxınlığın simvolu oldu.
Bu yaxınlıq daha da aydın şəkildə İsanın Öz Pasxasında təzahür edir. Kardinal bu anı “şöhrət deyil, haqsızlıq, qorxu və xəyanət anı” kimi təsvir etdi. Lakin İsa, yaxınlıq istədiyi üçün, son saatlarını dostları ilə birlikdə yemək yeyərək keçirməyi seçdi.
“Onun ətrafında olanlar insandır,” dedi kardinal. “Qüsurlu, müxtəlif insanlar. Bəziləri tələskən, bəziləri lovğa, bəziləri qorxaq. Amma onların hamısı sevilir.” İsa onlardan birinin Ona xəyanət edəcəyini bildiyi halda, diz çökür və onların ayaqlarını yuyur.
Kardinal bu dərin təvazökarlıq hərəkətinin Məsihin həqiqi keşişliyini ortaya qoyduğunu vurğuladı və əlavə etdi ki, dünya məhz bu cür keşişlərə ehtiyac duyur – və biz də məhz belə bir Kilsə olmağa çağırılmışıq.
O vaxt da, indi də
Kardinal Qambetti etiraf etdi ki, bu gün də xəyanətlər mövcuddur. “Həmişə bir Yəhuda var”. İstər insanlardan çox qazancı üstün tutan sistemlərdə, istərsə də nüfuz və rahatlıqla sınağa çəkilən qəlblərdə – müqəddəs olanı satma təhlükəsi hələ də mövcuddur.
“Və yenə də,” o əlavə etdi, “İsa hələ də diz çökür.” Kardinal vurğuladı ki, İsa bizdən kamillik istəmir, varlığımızı – mövcudluğumuzu istəyir.
Kardinal Qambetti Kilsəni və onun üzvlərini Yevxaristiya xalqı olmağa çağırdı: “Onun kimi parçalanan və paylaşılan; qəbul etdiyimiz şeyə çevrilən.”
“Ya Rəbb İsa,” deyə dua etdi Kardinal, “hər gün çörək və şərabın təvazökar şəklində bizə gəldiyin üçün təşəkkür edirik. Bizi də Yevxaristiyaya çevir.”
