Papa: "Gəlin müq. Yusifi və onun imanını təqlid edək"

ÜMUMİ AUDİENSİYA

Audiensiya zalı
Çərşənbə, 29 yanvar 2025
Yubiley 2025 – Katexizis silsiləsi. İsa Məsih bizim Ümidimizdir. I. İsanın körpəliyi. 3. “Onun adını İsa qoy” (Mt 1, 21). Yusifə müjdənin verilməsi.

Əziz bacılar və qardaşlar, sabahınız xeyir!

Bu gün biz ümidimiz olan İsa haqqında, Onun “körpəlik İncillərindəki” mənşəyinin sirri üzərində düşünməyə davam edəcəyik.

Luka bunu bizə İsanın anası Məryəmin nəzərindən etməyə imkan verdiyi halda, Matta İsanın qanuni atası olmağı qəbul edən, onu Yesseyin gövdəsinə və Davuda verilən vədlə bağlayan  Yusifin nəzərini götürür.
Həqiqətən də, İsa İsrailin gerçəkləşən ümididir: O, Davuda vəd edilmiş, evini “əbədi bərəkətli” edən nəslidir (2 Şam 7, 12; 1 Sal 17,11); O, Yesseyin gövdəsindən çıxan tumurcuqdur (Yeş 11,1), “saleh bir Pöhrə, [O] müdrikliklə padşahlıq edəcək, ölkədə ədalətli və saleh işlər görəcək” (Yer 23, 5; 33, 15).
Yusif Matta İncilindəki səhnəyə Məryəmin nişanlısı kimi daxil olur. İbranilər üçün nişanlılıq tam qanuni bir bağ idi və, təxminən bir il sonra baş verəcək nikahın qeyd olunmasına hazırlıq mərhələsi idi. Məhz o zaman qadın atanın himayəsindən ərinin himayəsinə keçirdi, onun evinə köçürdü və özünü analıq ənamına hazırlayırdı.

Məhz bu dövrdə Yusif Məryəmin hamiləliyi haqda öyrənir və onun sevgisi ağır şəkildə sınaqdan keçirilir. Nişanlılığın dayandırılmasına səbəb ola biləcək oxşar vəziyyətdə Qanun iki mümkün həll yolu təklif edirdi: ya qadının məhkəməyə çağırılması kimi ictimai xarakterli hüquqi tədbir, ya da qadına imtina məktubunun verilməsi kimi fərdi tədbir.
Matta Yusifi “saleh” insan (tsaddiq), Rəbbin Qanununa uyğun yaşayan və həyatının hər anında bundan ilham alan bir insan kimi müəyyən edir. Beləliklə, Yusif Allahın Kəlamına əməl edərək dərrakəli hərəkət edir: o, instinktiv hisslərə və Məryəmi qəbul etməkdən irəli gələn qorxuya ona qalib gəlməyə imkan vermir, əksinə, ilahi hikmətlə idarə olunmağa üstünlük verir. O, Məryəmlə sakitcə, təkbətək ayrılmağı seçir (Mt 1,19). Və bu, Yusifin müdrikliyidir ki, ona səhv etməməyə və Rəbbin səsinə açıq və itaətkar olmağa imkan verir.

"Qorxma!"

Beləliklə, Nazaretli Yusif Yaqubun oğlu, “yuxuların ağası” adlandırılan (Yar 37,19), atası tərəfindən çox sevilən və qardaşlarının nifrət etdiyi, Rəbbin onu fironun sarayında yerləşdirərək ucaltdığı başqa bir Yusifə bənzəyir.

Bəs Nazaretli Yusif yuxusunda nə görür? O, Allahın Məryəmin həyatında yerinə yetirdiyi möcüzəni, həm də öz həyatında olan möcüzəni görür: maddi və mənəvi mirası qorumağa, müdafiə etməyə və ötürməyə qadir bir atalıq möcüzəsini görür. Onun gəlininin bətni hər kəsə qurtuluş zəmanəti verən bir adı daşıyan Allahın vədinə hamilədir (Həv 4, 12).

Yusif yatarkən bu sözləri eşidir: “Davud oğlu Yusif! Məryəmi özünə arvad etməkdən qorxma, çünki onun bətnindəki körpə Müqəddəs Ruhdandır. Məryəm bir Oğul doğacaq və Onun adını İsa qoy, çünki O Öz xalqını günahlarından xilas edəcək” (Matta 1, 20-21).

Allaha güvənmək

Bu vəhy ilə qarşılaşan Yusif əlavə dəlil tələb etmir; o güvənir. Yusif Allaha güvənir, Allahın özünün və nişanlısının həyatı ilə bağlı arzularını qəbul edir. Beləliklə, o, ilahi vədi iman, ümid və məhəbbətlə yaşamağı bilənin lütfünə nail olur.

Yusif bütün baş verənlərə aid bir söz demir, lakin inanır, ümid edir və sevir. O, özünü “boş sözlərlə” deyil, konkret əməllərlə ifadə edir. O, həvari Yaqubun dediyinə görə, “Kəlamı həyata keçirən” (Yaq 1, 22), onu əməllərə, cismə və həyata çevirənlərin nəslindəndir. Yusif Allaha güvənir və itaət edir: “Onun Allaha qarşı daxili ayıqlığı... tamamilə kortəbii şəkildə itaətə aparır” (XVI Benedikt, Körpəlik tarixçələri, Milan-Vatican City 2012, 57).

Bacılar, qardaşlar, gəlin biz də Rəbbdən danışmaqdan daha çox qulaq asmaq lütfünü, Allahın arzularını xəyal etmək lütfünü və vəftiz olunduğumuz andan həyatımızda yaşayan və böyüyən Məsihi məsuliyyətlə qəbul etməyi xahiş edək. Təşəkkür edirəm!